Sajak : Nanang Sos
Sapiripis aya girimis hujan isuk,manjing waktu dina mangsana mumuluk
Pras pris hujan ipis maseuhan biwir biwir nu angar garing
Ngagareclang cipanon nu keur lapar ragrag dina tungtung sisi piring
Aya nu ceurik balilihan, mapaésan piring anu ménta eusi
Nawu cipanon dina lalakon nahan seueul kerebekna beuteung kosong
Ruhak ruhay dina suluh,ngagodog cai ngagolak asak
Unggal poé dapur simpé taya pasakeun seupaneun
Datang poé ganti minggu, unggal bulan ngadago datangna sugan
Kapakiran kamiskinan digemuk ku kasobaran
Kumarembing gupuy gapay unggal poé jajaluk mapayan jalan
Pasihaan Agaan.....,pasihan...Adéén...
Sora nu lapar namprakeun leungeun ngagidir
Pasihan Agan....Pasihan Adéén....Mulas melis dina lumengisna kesang tiiis
Datang beurang mapag harepan,nuturkeun kalangkang heulang
Ngawang ngawang nyawang harepan ngadago robahna kahirupan
Mun teu ayeuna, meureun isukan kabagjaan sugan datang marengan.....!!
* Tepis Kota Tasik,Januari 2013 *
Tidak ada komentar:
Posting Komentar