JATINING GALURA DINA WARUGA KULA

Peuting ieu sora angin ngaharewos kana panto hate

Peuting ieu panon kosong neuteup poto nu keur imut

Peuting ieu cipanon dosa mapaes rasa di juru panon anu keur nalangsa

Peuting ieu aya poto salira dina galura dipiguraan ku kasono

Peuting ieu aya satumpukan lalakon endah dibungkus kalangkang salira

Sajatina salira...satemena...weningna ka heman

Sajatina salira....satemena... Jatining Galura dina Warugana Kula

Sajatina kula.....satemena....ngawaruga dina Galurana salira

Sajatina kula.....jeung salira...mugia salawasna aya di sawarga....

Amin...

                                                            Tepis wiring Gn. Malati 5 April 20    

DEMI WANCI

  Mungguh  ari sadetik kapan leuwih pondok batan samenit

  Mungguh ari samenit kapan leuwih pondok batan sa jam

  Mungguh ari sajam kapan leuwih pondok batan sapoe

Ari sapoe  kapan leuwih pondok batan saminngu

Ari sa minggu tangtu leuwih pondok batan sabulan

Ari s abulan geus tangtu leuwih pondok batan sataun

Demi Wanci,horeng umur geuning leuwih pondok batan kahayang

 Demi  Wanci ari  kahayang leuwih panjang batan jalan anu arek disorang....

Demi paripolah geuning leuwih loba tingkah jeung salahna

Horeng ari napsu,geuning dipungkasna mung diukur  ku umur anu mungkur

Demi katingtriman horeng hirup salawasna,kudu madep ka Gustina...

                          

                       

                                                       Gn. Malati puhu  sep,2012

GETER

Sok lewang...nyorang leumpang dina mumunggang anu nenggang

Sok risi mipir pasir dina basisir hate salira

Sok Kaisinan mun rek mayunan kedah balaka ka salira ti payun

Sok nyeriii.....teh, lamun pamaksadan heug ditampik.......teu ditarima ku salira

Tapi sok bungah teh upami pamaksadan geus ditarima ku salira

Asa jadi Arjuna..... !

Tapi sok keuheul teh hate  upami diolo kedah mahugi kasalira

Kudu nganjuk ngahutang.....!

Tapi sok reueus teh ka salira lamun arek mulang heug diongkosan

Sawarga tah du,ana.......!

Amiin.....

                                                          

                                                                Tasik,Sep.2012

KANIA

                           

           Kania....duh.... Kania,lagu kalbu dina kalbu

Sumawur galindeng tembang kasmaran

Kania.....duh.... Kania,tingtrim asih na hariring

Kasanggakeun keur salira......

Mangga catet ku salira Kania...! catet dina tirtaning asih nu pinuh ku galeuh galeuhna 

kadeudeuh

Tapi poma ulah digeugeuleuh....margi.....!

Ieu asih meunang milah-milah meunang milih,meunang maut tina dasar ati anu wening

Mung kanggo salira..........sanyaliraeun......Kania !

Kania.....duh ...Kania....Katingtriman jeung hariring gumulung mungkus duriat

Kania.....duh....Kania,Duriat mangka teu pegat sing natrat nganteng sing langgeng...

Kania.....duh....Kania,Sadunya mung hiji Kania nu sok leukeun milu marengan....

Kania.....duh ....Kania,Kania teh hiji Mojang gambaran keur hiji Mojang.....

Nu mupusti kana jangji,teu weleh hirup saati,tara linyok tara bohong,lana satia micinta...

                                                                         Gn. Malati Puhu,september 2012.

                                                                           Keur : Nani Sy.

KATALIMBENG

Kagembang ku kembang nu ligar di patamanan

Siga endah  warna kasumba.....tapi pias

Beureum bodas....pulas saulas....horeng geuning pupulasan

Nyari manis tapi inggis sok sieun pinuh ku hinis.....

Aah.....lain bangban,lain pacing lain kananga kuduna

Lain babad lain tanding,lain kadinya kuduna......

Heuheuy deueuh......

Manuk japati sajodo dikeprak unteup  na taktak

Siga lindeuk reujeung  deukeut  horeng teh lain jodona

Ngundeur deudeuh dipakarangan deungeun

Teu gampang manggihanana......

Di kulayab di teangan disair beunang ku nu lian

Rancunit pinuh ruruhit.....ngan saukur bisa jumerit......

Abong hirup papasangan,teu gampang neangan layan

Ari jodo......?

Diteangan ngadon lumpat,didagoan teu nepungan

Binguuung......!

Gusti mah, maha uninga hirup huripna manusa, gumantung kana pangersa anjeuna