KASIMPÉ MÉPÉNDÉ HATÉ

Aya hariring nu sumanding dina jemplingna peuting
Duka soantena saha nu datang nepungan dina manjingna tingtrim
Ku salsé.........
Ngentring asih dina hariring sawirahma dina gending
Gahar sora dina rasa ngulayaban mapayan hambalan duriat
Antaré.........

Lagu teh nyamuni kalbu,maut asih tina getering dasarna ati
Halon anteng ngalagena dina dangding dangdingna pikir
Duka rék tepi ka iraha diri nyangsaya dina ayunan ieu lamunan
Unggal wanci dipépéndé ku kasimpé,anteng dikeukeupan harepan

Heemh....kakangen niruk lamunan malibir ka biwir langit
Teu puguh udageunana.........!

NGEUNTEUNG

Ngabedega nangtung hareupeun eunteung
Umat imut,sura seuri nyeungseurikeun diri
Geuning teu nyari....!
Dina diri loba daki kekebul paripolahna diri

MOJANG BEKASI

Ngaprak leumpang duaan di lebah Cihampelas
Kawaas nyacas ngagenyas.....
Suka seuri sawiati saati dalit ngahiji
Lir Déwi Pohaci...lumungsur turun ti Bekasi
Geuning kiwari bet jadi bari....?
Bongan angin sumilir sok tara lana,
Boa geus aya deui nu miboga nya ?

Piraku.....rék luas téga nyieun céda.........!

SAJAK RASA

Sajak rasa tinulis na wanci peuting
Manjing lilir sangkan peutingna kabawa ngimpi
Wilujeng wengi jungjunan.....

Sagurat duriat nyanggakeun kanggo salira
Mugi kasurti ku ati muga kabaca ku rasa
Kedah ditampi ulah ditampik.....
Bongan ditampik sok jadi nyeri.....!

SALÉNGKAH DINA NGALÉNGKAH

Asa cikénéh ulin cai hujujanan di lebah lembur
Waktu muter nguruilingkeun lalakon muterkeun jaman
Ti Mangsa ka mangsa di deupaan dijeungkalan disorang ku sorangan

Asa cikénéh....ngalalakon jadi budak ogo lumah laméh kanu jadi indung
Diusapan,dihuapan,dipihéman dina lahunan nu jadi indung
Waktu muter nguruiling muterkeun umur.....
Sakorépat mangsa ngejat ngaliwat ninggalkeun mangsa
Mangsa keur budak ngalangkang dina ka kawaas

Tanggah ka waktu horéng umur geus manjing ka tunggang Gunung

PADUSUNAN
Ngulampreng nganjang ka palebah Gunung Bubut
Haréwos angin lembur noélan acining batin....
Kakangen rasa ngulampreng ngahelaran raga
Batin ngait ngageuri nyantél kaLembur
Kingkilaban Pilemburan gugupay ngajakan mulang
Sedeng diri nyanding pikir di pangumbaraan
Duka tepi ka iraha raga sidéngdang niiskeun pikir di lembur batur

Can kapikir............!!

TIBELAT

Sakorépat haté lumpat rurusuhan muru beungeut lembur
Tanggah nanjak ngarénghap dina tanjakan Cicadas
Gupay rasa kakelar muru Ka Gunung Bubut
Juuh asih muru pangampura Indung......

Kantun kawaas ngukusut pikir keur gandrung
Beungeut indung kiwari nyérangkeun ti Alam kubur......

*Tepis wiring Lembur kuring Congo Januari 2013 *

MURAK LAMUNAN

Ngalangeu nangkeup harigu hareupeun jandéla
Aya angin kahéman datang nepungan mawa kasono
Ngaranggeum eusi haté dina ramo réma rémana kanyaah
Mawa teuteup jumajap eunteup na geugeut
Pereket pageuh rumaket raket meungkeut ku kadeudeuh

Renung sirung dina pucuk pucuk ibun asih
Hawara Gunung juuh dina teuteup nu linduk linduh
Sadami rénghap haroshos dina ketugna jajantung
Kembang asih mayak dina amparan mamarasna rasa

Kagandrung wuyung nalikung nepungan napuk sagunung
Anteng ngahuleng murak geter dina geter,
Rasa duaan ngalarung jauh ngarumpak rangkulan duaan
Guneman batin ngadongkang umanjang kanu nyorangan
Kasimpé haté sumélékét ngarampa haté sorangan
Galecok haté cumarita dina lalamunan jeung susuganan


• Tasik, Januari 2013 katompérnakeun *

AKAD TIKAH.

Saucap sakecap sapaniatan sapamaksudan
Kedal lisan dina akad tikah...
Ngabulungbung ngudag lengkah kabagjaa
Neangan ridona pangeran
Mugia........

JATUKRAMI

Nyiar bagja......
Nyatet tanggal dina titimangsa

Datang waktu muru cunduk
Milih Wanci nu mustari
Pasini jangji dina Jatukrami

NGAWALIAN

Gumulung ngagorolang dina ucap
Cipanon bedah ngarawu rangkulan kabungah
Akad tikah dina ibadah
Ngahalalkeun anu asalna teu halal

Mugia ngampar dina barokahna Pangeran
Amiiin.......

1. Paniatan anu utama pikeun ngalengkah dina nyiar kipayah.Nya eta kudu wani ngabuleudkeun paniatan hate bari niatana kareana Alloh seja IBADAH

2. Sagala rupa garapan pagawean Insyaalloh bakal jadi Amal ibadah,asal dina hate teu boga paniatan arek " NGARUGIKEUN DIRI BATUR JEUNG TEU BOGA NIAT AREK NGARUGIKEUN DIRI SORANGAN "

3. Hirup bakal karasa tingtrim Batin,asal diri geus ihtiar turta tumamprak pasrah sumerah kanu maha kawasa bari salawasna tara lesot tina DIKIR jeung MIKIR.

( * NASOS TASIK * )

iNDUNG

Bada subuh muru lembur,ngagedig mapayan galengan
Sakolébatan pameunteu Ema némbongan
Diburu,disusul.....ditepungan
Horéng indung keur aya jeroeun padung

BAPA

Nyekar nganjang ka Makam nu jadi Bapa
Linduh liuh sorot soca Bapa, teu weléh baé kacipta
Ngagerendeng runtuyan du,a maturan keclakna cimata
Horéng Bapa keur sidengdang aya di lebah Sawarga
Mugia....Amin

PAHATU LALIS

Ngahelas nalangsa,ditilar ku jalma nu dipikacinta
Tilu sadulur ngariung kiwari teu boga indung jeung Bapa
Mulas melis kingkin pikir ngajadi pahatu lalis
Balilihan ceurik batin cuang cieung ngan ukur tilu dulur
Sadar kadar horéng dunya ngan saukur pupulasan sisimpangan ....
Dunya raga anu dipiboga datangna ngan saliwatan
Nu anteng langgeng ayana nya dikalanggengan.......

Tasik, 13 Pebruari 2013.